HMANGAIHNA RINGAWT HI A TAWK SI LO.
(Benjamin Lalhmingliana)
Sunday tlai ani a ni a tla lek lek tawh a favang ni tla tur chu a sen phut a,thlanmual chu thli thaw heuh heuh chuan a ti vawt lek lek a,thlanlung pakhat nghengin ka thu a darkar khat dawn ka thu tawh,thlanlungah chuan Lalthakimi tih a in ziak kalh a,muang changin ipte chu kan zen a lehkha thawn sei fu chuar tawh tak hi ka phawrh chhuak a kan zut mar a a tawp lamah chuan ti hian a lo inziak..
"...Ka lo thi ve dawn hnai tawh a,ka lo thi anih chuan ka thihniah I tan lo kal a remlo mai thei,thil pakhat ka hrilh duh che chu ka thihni hian ngui tak a awm a thawmhnaw dum nen indawm kun turin ka duhlo che a,hlim takin nuih tum zawk la,mahse,ka ngen duh zawk che chu min hriat reng erawh ka duh,kumkhat hnu velah ka thlan ilo tlawh anih chuan a hlu viau ang,Sunday tlai ni thei se.."
Tha-i nen kan inhmuh hmasak ber chu Bazar ah second hand kan thin tum ani a,vawikhat hmuhna a han tha bik vul chuk a sawi tur pawh a nilo,ka bulah a thu ve tih pawh ka hre lem lo a,kawr tha deuh mai pakhat ka hmu fuh a kan thing chhuak chu a sir lehlamah a lo chelh ve chiah,hei hi chu ka la hmasa ka ti bul nghut a,ka chelh hmasa zawk a ti ve tlat sia rei ngial kan inhnial hnuah ka kian ta nge nge a.
A hnu kumkhat daihah kan inhmu leh chauh a Sialsuk ah ka thiante inneihna ah ka kal tumin a nia mo thianah a lo tang,Sialsuk khua alo ni reng a kan inhmuh hmasak khan Aizawl a lo zin lai a lo ni a.Kan han inkawm chho chu kan inpawh nghal em em a zep rual lohin kan inkarah engemaw a awm nghal a.Kan inkawp chhung hi hun rei ani hauhlo,kumhnih awrh chauh ani ang,he kumhnih chhung hian thil tam tak a thleng thung.
Kar tawp tin hian ka zin chho a ni deuh ber a an inah ka thleng mai thin.A nu leh pa an in then a a nu nen chauh an awm a,a changin anu zin hlanin ka riak chho a,hmun hran daih a kal nuam ti chi a ni Sialsuk tlang te leh hmun hrang hrangah chawfun nen kan kal a kan titi nileng zak zel a,a chang leh hmuifang ah te kan va riak leh ang lawp lawp a.
Amah hi a chang chuan engemaw mawlh riau tu awm ang deuh hian a awm thin a,han zawh lah in engmah anilo a tia hlim hmel deuhin thildang a sawi daih zel.Kumhnih vel dawn kan inngaihzawn ve hnu chuan tumkhat chu inneih ka duh thu ka hrilh ta rawih a,a hlim viau ka ring nghe nghe.Mahse,beisei ang a ni ta hauhlo mai a,a ngawi reng a hnuailam a en a a hnuk a ulh ni nghe nghe in ka hria,rei ngial hnuah a rawn dak chhuak a, 'kan innei theilo ang, Sangte' a ti ta tlat mai a.'Engvang tehlul chuan nge kan inneih theihloh anga?Kan in hmangaih a,tin,I chhungte pawn an phal ang' thinrim deuh lek lek in kan tia.'A chang chuan hmangaihna ringawt hi a tawklo thin a lawm' a ti leh ringawt a a bak a sawizawm duh silo.
Hemi ni atang hian kan inkarah engemaw tak diklo riau awm in ka hria a,a hmuh erawh kan inhmu fo a,tumkhat chu phone ka dawng a Tha-i a lo nia.Kan inkar hi tihtawp mai a tha in ka hria hmalam hun hi kan nei dun thei dawn chuanglo a kan innei thei dawn chuanglo, min ngaidam rawh tih zawng a rawn sawi a.Ngati nge?midang kan karah an awm ami ka tih lahin awmlo a ti bawk si.Chumi ni atang chuan ka be thei ta reng reng lo a,han zin a thil zawh fiah pawh ka duh viau na a tlawmah ka la ve a,hnawl nihte,ban nihte Hi thil nuam a lo nilo tawp a atlawmthlak bawk nen a chanchin lam reng reng pawh ka ngaihven duhlo a hna ka thawk vak vak a zan erawh mut a har duh ngang mai. Tha-i ka nunah a awm ve tawhlo tih ngaihtuah ringawt pawn khawvel hi a ruak huai in ka hria.
Kum a rawn vei chho a Tha-i chanchin ka hriat leh hmasak ber chu a thiannu in a thi tih minlo hrilh a.Engkim kan nunhlui thi tawh a ka ngaih kha mitthlaah a lo lang nghal zut zut a,Sialsuk-ah a rang a rangin ka tlan chho nghal a.Sialsuk ka thleng chu Tha-i nuin Taia(Taia tiin min ko thin) tiin tap chungin min lo kuah a ka intipachang a sawi tur erawh a vang ngang mai.Vui zawhah chuan tlailamah Tha-i nu nen kan titi a lehkha envelope a intuam thlap hi min pe a,heihi Bawihin lo pe rawh min tia a ti a.Bawihi khan a boral dawnah pawh a lam reng che a kan ko mai ang tih lahin chhe tak a ka awm lai min hmuh ka duhlo a ti bawk sia a rilru erawh I luah khat vek,he khawvel pawnah hian ka lo nghak ang a ti nghe nghe che a ti a.
Muang changin lehkha chu ka hawng a kan chhiar chu mittui tlak loh a van har em! A tleirawl laiin ngaihzawng pathlawi a lo nei ve a an lo chesual a chupa atang chuan HIV a lo positive ve reng chu lo niin.Zan tam tak kan riak dun a chetsual a duhlo a atang tlat thin te kha ka ti tau bur bur thin kha ania,I tan a tha zawk a tih mai thin kha minlo hmangaih vang zawk alo ni tih ka hrechhuak a.Kha hun reilote kan inkawp chhung khan hmun hrang hrang tlawh dun te kha a rawt chul thin a a chhungte lahin an phal mai zel te kha mak ka ti viau thin a hun a nei tam tawh lo tih a hriat vangin kan nun kha a lo thlahlel em em a lo ni chuan!ka van khawngaihin ka van hrethiamlo thei zawk tak em! 'Ka thil lo tihsual vang a nang leh zel rilru na tak a ka siam che hi hrehawm ka tih ber ania ka inngaihdam theilo,min ngaidam dawn nia aw' tih thu aziak ka chhiar lai chuan ka chhiar zawm theilo.
Aizawl ka haw thla leh chu awmngaihna thlawt ka hrelo a,Tha-in inthen thu asawi khan hrehawm ka ti hle a tunah erawh khawvel hi a puak a ni ringawt.Na te hi a nat tak tak chuan kan sawi peihlo a kan tap theilo,kan ngawi hmak a melh ngai kan melh tlawk tlawk mai.Hmangaih tak hi khawvelah tawn a har tehlul nen kan han tawng a a changin kan tawng hma lutuk a,a chang leh kan tlai lutuk,a chang leh khuarel vang a inthen angai thul.In hmangaih ve ngawih ngawih leh in thlahlel ngawih ngawih min haihthentu he natna ber kher hi chu ka van haw em!
Min haithen tur hian engmah hi lian tawk a awmlo ni a ka hriat lai te Khan hringnun a kan thu loh zia hi ka lo va hrelo tak em!Khuanu in a suih siloh mihringin suih zawm kan tum ve te hi chu engmah hi nghet tawk a lo awmlo a,beiseiloh lam atang hian engemaw hian min pawt thenin min pawt phar dawr dawr anih ber hi.Ka tha neih ve leh ka chakna te hi nang chelhbet tur hian a tawk zo lo a,engkim mai hian nang hi min hriatchhuah tir dawn a loh nih tak hi.Nia,a Chang chuan hmangaihna ringawt hi chu a lo tawk zo lo a lo ni.
Kumkhat a vei hnuah a duh ang ngeiin a thlan ka tlawh leh chu ania engkim mai erawh nimin ang mai niin ka hria.Ka tho a atawp nan Tha-i thlan chu ka melh leh vang vang a muangchangin an in lam panin ka phei ta a.Room-ah ngawi rengin ka luttlang a,tunhma a Tha-i te in a ka thlen a ka mutna thin chu a vawt ruih in ka hria a,ka tlu zal a Tha-i nuin thingpui minlo pek pawh chuan ka lo be lemlo ani pawn biak enah min en bik lemlo a.A hnu deuhah a rawn lut leh a Tai-a I thingpui a vawt vek a lawm tirawh chaw lo ei mai rawh a rawn ti a.Thingpui chu kan khawih a reilo te emaw ka tih chhungin a lo vawt vek a.'Chaw ka ei peihlo Ka pi' tih chiahin ka chhang a ka mu zal leh daih a.Mittui han dan a intihpachan pawh ka tum buai peih tawhlo.
Zanah chuan Tha-i cousin innei thar mikhual a lo thleng ve chu room lehlamah an mu a,hlim tak a an Infiam vel chuan ngaihtuah a ti thuiin khua a tihar zual in ka hria.Tha-i nu chuan 'Tai-a,mangtha aw' a rawn ti a.'Mangtha le' ka ti a mut erawh muthilh rual ani lo,midang rilru tihhah ka hlauh vangin ngawi rengin rizai hnuaiah chuan ka inthawlh ta a.
